大家樂推惜食減浪費 叫少飯半飯齊捐錢行善

減少剩食並唔難，大家只要由日常生活入手，個個都係達人！黛安知道，大家樂今年再推出「粒粒力量LOVE LOVE香港」惜食活動，鼓勵大家由源頭避免浪費食物。大家樂噚日喺銅鑼灣翡翠明珠廣場Festiva舉辦「粒粒力量LOVE LOVE香港」啟動禮，活動大使「暖心男神」陳家樂同「正能量女神」衛詩雅仲現身支持！

大家樂集團首席執行官羅德承宣布，即日起只要客人幫襯飯類產品（蒸飯、焗飯、菜飯及即炒類產品除外）時，向收銀員講一聲「少飯」或者「半飯」，大家樂就會捐出每客3元畀聖雅各福群會眾膳坊食物銀行，同食物援助協作平台「FOOD-CO」！

羅德承話，大家樂一直好關心香港社會同環境，希望消費者意識到憑住每個人小小力量，都可以眾志成城，為社區帶嚟正能量，亦都係「粒粒力量」背後嘅理念，鼓勵大家一齊從源頭推動惜食，按自己需要去要飯量，減少剩食。咁有意義，黛安今日食晏，就一於要一齊為地球出一分力！