PMQ「玩創夏樂園」 鼓勵孩子「齊發夢」

暑假得番最後1個星期左右，學生哥當然要把握時間玩到盡！但有咩好得過邊玩邊學嘢呢？黛安收到風，PMQ元創方今個周末將舉辦「玩創夏樂園」，由簡易嘅「圓」同「方」出發，變出無限可能，當中仲會有4大玩創專區，同埋各種得意工作坊，鼓勵大人細路「敢想」、「敢玩」、「敢創造」，好有意思啊！

黛安知道，PMQ元創方今次主要會用圓同方2個基本圖形為主題，創造各種有趣場面同遊戲畀大家玩！當中布置上都落足心機，好似PMQ Courtyard就會變身成「圓圓‧日夢」嘅異想國度，將多個圓形呼拉圈建構成不規則嘅懸浮裝置，令佢好似浮雲咁飄喺半空中，從不同角度都可以睇出不同嘅形態；地面亦鋪設咗經循環再用嘅再生海綿，畀小朋友喺上面跑跑跳跳，甚至可以瞓上去齊齊望住舊浮雲發夢，激發大家盡情想像、擁抱童真！

唔止咁，發完夢之後仲有遊戲玩，「玩創夏樂園」亦特別設置咗「玩玩」、「畫畫」、「猜猜」同「想想」4大玩創專區，例如有只提供簡單巨型浮棒嘅草地樂園，畀大家自己憑創意製造玩具；仲有與別不同嘅方型泡泡、只提供麻繩同顏色紙等物料嘅「畫畫區」等，鼓勵大家跳出框框。

另外仲有「身體遊樂場」、「創意分子雪糕」等工作坊，認真夠創新，絕對大人細路都啱玩！咁開心，等黛安呢2日都帶埋身邊啲契仔契女去感受吓先得！