肯德基支持環保 即日起「走塑」

肯德基都走塑啦！肯德基噚日宣布，即日起停用塑膠飲管同杯蓋，希望為環保出一分力，黛安都好支持啊！

公關姊妹話，其實早喺上個月16號起，已喺9間門市試行，客人堂食時購買指定凍飲，店員唔會主動提供杯蓋同飲管，結果試行第一日已有好多市民支持，所以決定即日起除指定特飲同外賣飲品外，香港同澳門全綫分店都停止供應塑膠飲管同杯蓋。

除咗呢次行動外，姊妹話喺2014年就推出節能洗手機，採用咗最新科技，至今已慳咗近1,031萬公升洗手用水；亦都有同非牟利機構惜食堂合作，自去年至今就收集近2,000公斤食物，經加工後轉贈有需要人士。肯德基香港及澳門首席營運長袁柔敏話，好明白即棄塑膠對環境所帶來嘅影響，希望能為環保出一分力，只要每人肯多行一步，一定可帶來改變。