旅發局「探攝‧香港」比賽 紀錄最地道特色 劉偉強都撑

成日有旅客話來香港玩，除咗Shopping就係美食，名導演劉偉強就話，其實香港「度度都正」先真！黛安知道，為咗向旅客推廣香港本地文化，旅發局最近同劉導演合作，搞咗個攝影比賽，鼓勵大家影低自己心目中最地道嘅香港，仲隨時有機會成為宣傳香港嘅廣告作品，畀全世界齊齊欣賞，好吸引啊！

你心目中最地道嘅香港係點呢？對劉導演嚟講，就係日常生活！佢話，香港18區「度度都正」，就如生活中常見嘅「叮叮」電車、蛇舖等，全部都各有特色，而佢自己就最推介鴨寮街，因為多嘢食又多嘢買，夠晒地道特色喎！

旅發局市場推廣總經理曹天麗（Tina）講，近年旅遊潮流慢慢變成地道文化為主，唔少旅客已唔再想嚟香港Shopping或睇夜景咁簡單，所以局方今次同劉導演合作，舉辦「探攝‧香港」攝影比賽，希望藉大家鏡頭力量，為旅客介紹只有本地人先知嘅地道藝術、文化同景點，豐富佢哋嘅旅遊經驗！

黛安仲知道，得獎者獎品超豐富，除咗有價值5,000元嘅現金禮券、尖沙咀貴賓專區欣賞「2019香港除夕倒數」煙花外，作品更有機會成為宣傳香港嘅廣告作品，兼喺海外展出，咁吸引，大家記住把握機會喇！

比賽詳情

主題︰你眼中最地道的香港

提交方法︰即日起至9月30日前，上載作品至活動網頁或Instagram並標籤#ReframingHK或#DiscoverHongKong

評審準則︰選出50份作品，再交全民投票選10份得獎