《晴報》老友「蟹逅」萬麗海景 齊歎大肉蟹

黛安之前喺《晴報》專欄作家Cecilia推介下，一嘗香港萬麗海景酒店滿福樓嘅「蟹逅饕宴」，點知一試難忘。上星期Cecilia仲約埋成班蟹痴老友食蟹兼慶祝一番！

當晚有《晴報》社長麥華章、《晴報》專欄作家查小欣、胡孟青、項明生（James）、鄧達智（William）同佢partner陳醫生（Clement），仲有Irene和Iris。適逢小欣姐生日，又預祝Clement診所開幕，兼慶祝小欣姐、James和鄧達智嘅新書提名「香港金閱獎2018」，真正三喜臨門，大家都非常盡興！

因為天氣關係，嗰晚無加拿大登爵尼斯蟹，改用越南嘅大肉蟹，但一樣非常好味，黛安亦決定試多次海鮮湯花蛤煮越南大肉蟹，鮮甜湯頭，用龍蝦殼同蟹殼熬煮最少一個半鐘，再加入蝦、花蛤、鮮菇同唐芹等新鮮食材，蟹肉吸收晒濃湯嘅精華，食過翻尋味。今次仲有新菜「雲丹醬焗肉蟹」登場，醬汁用馬糞海膽加入蛋黃醬調配，仲有風味金榜開邊龍蝦。聽Clement講，一般濃味食物若配碳水化合物如麵包去食，味道更好，黛安聽完，都即刻試下，果然別具滋味！