中港城利東街合作 巨型月兔陪你過中秋

中秋節梗係要同至親至愛嘅人去賞花燈啦！黛安今年就一定會去尖沙咀中港城或灣仔利東街，睇下由澳洲著名藝術家Amanda Parer創作嘅巨型月兔！

聽公關姊妹講，舊年利東街展出嘅「月球博物館」，非常受歡迎，今年就破天荒同中港城合作，打造出一個別具特色嘅中秋節展覽，邀請咗澳洲藝術家Amanda Parer，帶嚟10隻唔同趣致造型嘅巨型發光月兔，最大嗰隻有7米高，絕對唔可以錯過啊！

姐妹話，下個月19號至10月17號，分別會喺中港城平台同利東街中庭展出。聽講啲月兔去過全球80幾個城市展出，有法國、英國、芬蘭、德國等，喺超過40個國際藝術節如新加坡國家美術館、倫敦冬季燈節同三藩市藝術委員會藝廊等巡迴展出，全球有成600萬人次見過佢哋。今次可以喺香港近距離「打卡」，真係好難得。

姐妹仲話，除咗月兔，利東街首次引入嶄新嘅遙控燈光技術，同時配備iBeacon推送功能，配上超過800個彩色花燈，打造不一樣嘅「光影．利東」。大家仲可以用利東街手機程式控制花燈，同參加「尋花燈‧猜燈謎」贏取獎品啊！