apm夜書市開鑼 1折買好書

噚日黛安到觀塘apm shopping，見到商場內為期11日嘅書展「樂活VIVA達人夜書市」已經開幕，場內不單只買到唔同種類書籍，亦可以買文具，非常方便。聽公關姊妹講，買一本書就有9折優惠，2本就85折。如果想更抵，商場仲推出夜行優惠，到夜晚9點後，超過1,000本圖書售價低至1折。另買滿600元或以上，會有書券或精品送，大家仲唔快啲行動？

黛安知道，夜書市共分為6個主題區：樂活文創工作坊、愛書共享、健康專區、品味生活、漫畫地帶同人氣精品。商場喺夜書市期間邀請超過20名人氣作家同潮流文化人喺活動說書及舉行簽書會。

夜書市除咗賣書亦不忘善舉，今年apm首次同曙光計劃合作，鼓勵市民可以即場捐書。市民只要捐贈一本勵志書，就可以換到一本全新嘅心靈或勵志書；亦有義賣活動，約300本書售價低至1元，希望將收益用嚟幫助基層家庭。