周日世界直升機日 11機空降「中環夏誌」

一年一度嘅「中環夏誌」喺上個月開始咗喇，唔知大家玩咗未？黛安知道，今次活動其中一個重頭戲係今個月19號（周日）舉行嘅「世界直升機日（香港）2018@中環夏誌」！

每年8月嘅第3個禮拜日，被列為世界直升機日，全球各地都會舉行各種活動。香港飛行總會基金今年再同主辦單位Central Venue Management（CVM）合作，喺中環海濱活動空間上晝10點半至下晝3點半舉行呢個世界級航空盛會。

當日將會有10架唔同型號嘅直升機同埋1架定翼機降落喺中環，等大家「打卡」打餐飽，仲有真正嘅機師駐場分享直升機嘅特性同埋航空樂趣添！香港飛行總會會長陳栢堅話，直升機可以垂直升降，有水平旋轉嘅旋翼；定翼機就有固定機翼，需要跑道起飛同埋降落，各具特色。

黛安仲知道，CVM仲會同香港夏威夷小結他協會3度合作，喺今個月18號下晝4點至9點舉行夏威夷小結他嘉年華，到時會有嚟自世界各地同埋本地嘅夏威夷小結他好手聚首一堂彈奏精采音樂㖭！