六廠開放一連三周 試玩紡織手藝

正值暑假，各位家長成日都要諗帶小朋友去邊度「放電」，黛安知道由舊南豐紗廠改建而成嘅「六廠紡織文化藝術館」（CHAT六廠），即日起一連三個星期首度向公眾開放，仲會有連串「共學」工作坊、藝術家講座同電影放映會等，等大家好好了解香港紡織業昔日嘅傳奇以及最新嘅紡織染手工藝創作，真係大人細路都啱玩！

黛安知道，CHAT六廠最近推出咗名為「盛夏手作︰來建紡織村」夏日共學月嘅活動，其中將會有一系列嘅紡織體驗活動，好似可以畀大家一試刺繡樂趣嘅「刺繡花園」、由專業紙樣同車衣師傅坐鎮，指導參觀者親身製作紀念品嘅「自助紀念品製作廣場」等，一於齊齊試下喺製衣廠返工，感受昔日生產模式！唔止咁，現場仲會展出多個珍貴舊紡織機器，同一條由600位公眾人士，以回收布料同竹框合力編織而成、全長約35米嘅「紡織龍」，好有意義，展期由即日起至8月19日，大家記住唔好錯過喇！