太古ArtisTree「公開排練系列」 近距離欣賞藝術

黛安都喺太古坊附近返工，公關姊妹就介紹，近來太古地產ArtisTree嘅「公開排練系列」正式揭幕，早前第一個劇目《Emoto》已公開演出咗，嚟緊8月會有第二個劇目《iCoDaCo》，參加嘅舞蹈家全部都獲獎無數，真係值得一睇！

姊妹仲話，「公開排練系列」包括兩個舞蹈同劇場作品，喺7月同8月每月共上演4場，每場大約1個鐘。首個公開排練嘅係《Emoto》，由日本團隊「國際劇場藝術中心」，夥拍本地劇團「糊塗戲班」一齊創作。《Emoto》演員兼糊塗戲班創辦人及行政總監魏綺珊就話，呢個難能可貴嘅機會，令演員可以嘗試唔同挑戰。

至於第二個劇目就係由歐洲舞團ilDance以「衍變」做主題，製作為兩年一度《iCoDaCo》舞蹈計劃嘅其中一部分，由國際著名舞蹈家梅卓燕、唯一獲邀參與2018愛丁堡藝穗節嘅香港舞者李偉能（Joseph）等獲獎無數嘅藝術家共同創作。首次公開排練係8月17號同20號，公開試演就係8月22號，之後佢地仲會喺威爾斯、瑞典、匈牙利繼續創作，最終成品就會喺今年11月在波蘭首度公演喇。