7-Eleven×Tsum Tsum 百變組合BOX 夠cute又實用

7-Eleven又有新驚喜！黛安收到風，7-Eleven聽日起推出Disney Tsum Tsum精品換購—百變組合BOX，12款都有Q版3D造型，好似Mickey Mouse、Winnie The Pooh等，儲齊擺喺office即刻醒神晒！

公關姊妹話，百變組合BOX特別之處係每款都配上一個Tsum Tsum公仔嘅前部或後部配件做手柄，實用之餘又夠Cute，只要輕輕一啪，就可以將Tsum Tsum公仔除低。集齊鍾意嘅Tsum Tsum角色前後配件，更加可以拼合成完整Tsum Tsum公仔玩層層疊。一個BOX幾種玩法，得意又夠Fun！而每款都印有人氣角色名稱嘅hashtag，夠晒標誌性！

姊妹仲話，個BOX係正方形，尺寸剛剛好，又可以自由組合，隨意疊起擺放，勁慳位，啱晒鍾意小文具同飾物嘅OL，拉開抽屜擺文具，咁就唔怕張枱咁亂啦。

咁幾時有得換啊？姊妹話，聽日早上7點起至8月28號，只要喺7-Eleven分店購物滿$20就有1個印花，其後每$10就可以獲得多1個印花，餘此類推。即日至9月4號，儲齊22個印花，就可以免費隨機換領Disney Tsum Tsum百變組合BOX一款，或儲齊5個印花加$26換購一款。