美國唇印藝術家 吻出日落維港

唇膏唔只用得，原來仲睇得！黛安聽講，海港城邀請咗美國「唇印藝術家」Lipstick Lex由今日起至下月22日，首次喺海港城港威商場大堂II舉行「唇印藝術展」，主題係維港景色日落，藝術展將展出22幅Lex嘅唇印作品並公開發售，當中近一半係為今次展覽而創作。

Lex仲利用咗超過30個品牌嘅唇膏，印上過萬唇印，創作咗一幅長3米、最巨大嘅新作「日落維港」，內容描繪一艘帆船喺日落時分行駛維港嘅醉人美景。為咗配合今次藝術展，現場仲有一個巨型LED唇印攝影區。

同場仲設有香港首個「Lipstick Tasting Bar」，等女士們一站式免費盡情任試34個品牌、超過200款唇膏！透過現場參與網上心理測驗，仲可以參加唇印藝術工作坊！