玩轉樂園 支援特殊學童 迪士尼萬聖慈善跑

喺萬聖節期間，黛安除咗去尖沙咀同蘭桂坊扮鬼扮馬之外，咁多年嘅慶祝都無乜新意。但近排聽公關姊妹講，東華三院會同香港迪士尼樂園合作，喺11月3日舉辦「萬聖節反轉樂園慈善跑」，係迪士尼首次喺園區入面搞嘅慈善跑，將慈善、娛樂、運動集於一身，為萬聖節增添不一樣嘅色彩。

大會話，慈善跑全長3公里，參賽者會穿越唔同主題園區，沿途仲有唔同角色幫健兒打氣；慈善跑完結後，參加者可以留喺樂園繼續玩，同參加東華三院嘅專屬活動，包括怪誕城之夜、迪士尼魔法書房。

東華三院主席王賢誌話，今次慈善跑募得嘅善款將全數撥歸東華三院何玉清教育心理服務中心，幫助有特殊需要嘅學童及家長，希望佢哋可發揮所長，學習與人相處，同適當咁表達自己。

參與者關太同丈夫就曾參加過中心舉辦嘅「親親孩子心」計劃，事緣佢8歲嘅大仔從小就非常依賴佢，只要一分開就變得焦慮甚至大喊。關太話，比起一般課程，呢個計劃較着重父母嘅情緒同經歷，課程後佢學識妥善處理雙方嘅情緒，變得更有同理心。

公眾可以喺7月4號起於官網報名參加慈善跑，姐妹們，一齊共襄盛舉！

講開迪士尼，前日公關姊妹仲寄咗Duffy小熊嘅新朋友Cookie小狗毛公仔畀黛安，聽講嚟緊7月3日會喺香港迪士尼樂園同大家見面。Cookie有奶油色毛髮，有對又圓又大綠眼睛，咖啡色嘅耳朵長長向下垂，相信好快會俘虜大班粉絲follow啦。