動夏嘉年華 玩轉巡遊滙演 海洋公園動感新體驗

暑假就快到，海洋公園喺6月30號至9月2號就會舉行「動夏嘉年華」，海洋公園行政總裁李繩宗同黛安講，預計海洋公園水上樂園明年就會落成，所以試下用南美巡遊同嘉年華方式，代替以往嘅「夏水禮」，今年活動充滿加勒比海風情，希望帶畀遊人動感嘅新體驗。

好似「加勒比巡遊」會以「夏日」同「夏夜」做主題，日間表演者會着上用動物為主嘅服飾，用水槍向遊人大噴水花，諗起都透心涼；夜場就會換上七彩繽紛嘅夜光服飾，繼續同遊人狂歡。除咗兩大巡遊外，怡慶坊仲會舉行「火熱奇技大滙演」，由健力士紀錄蓮步舞人Shemika Campbell表演拗腰神功；首次來港演出嘅加拿大國家級韻律泳團體，更會喺海洋劇場表演水中芭蕾「韻律水精靈」。

另外，園內餐廳同美食攤位仲會推出過百款美食，包括米芝蓮星級名廚陳國強設計嘅「夏季嘗味菜單」，如黑松露醬燒加拿大帶子咁，以及冰爽特飲，黛安都想去試下。

海洋公園主席孔令成仲話，預計嘉年華可以吸引超過100萬人入場，遊人仲可以喺夜晚8點半至11點免費入場參加「DJ狂熱」派對。