PMQ過瑞典仲夏節 玩遊戲贏手信

創作力量同優質，就係瑞典最勁嘅Power！上個星期五，黛安就特登去咗PMQ元創方舉行嘅瑞典日參觀，除咗見到特首林鄭月娥同瑞典駐香港總領事Helena，仲係日健企業嘅公關姊妹身上學到唔少瑞典文化。

原來6月係瑞典嘅國慶同仲夏節，PMQ裏面被綠色枝條同花環包圍嘅「仲夏柱」，就象徵人同自然結合嘅頑強生命力。黛安嗰日都係瑞典民謠樂隊Skäggmanslaget演奏嘅傳統音樂中，同大家圍住3.5米高嘅仲夏柱跳舞。

當日日健企業仲舉辦有獎小遊戲，環保工作坊同營養師坐鎮嘅體檢活動；黛安就玩咗身體拼圖遊戲，將五臟六腑「砌番」原位，成功攞到來自瑞典嘅手信！同場仲可以整環保乾花明信片，色彩繽紛又精緻，送畀親友最啱。