中醫義診測體質 免費試食鮮杞子果

天時暑熱，更易焗親攝親。唔想畀病魔擊倒，先要了解自己體質養生。黛安留意到，嚟緊星期五（8日）起至星期日（10日），灣仔會展將舉行「第十二屆健康博覽」，到時註冊中醫師趙仕祥會即場免費義診，仲會幫大家分析「體質抗熱指數」，睇下係「虛寒」定「實熱」，就可「對症飲湯」。

趙醫師指虛寒嘅人，可以利用夏季「以熱攻熱」、「冬病夏治」改善健康；實熱嘅人就要避免火上加油，唔好食薑「加熱」。同場仲會免費派鮮杞子果，有齊降血糖、抗脂肪肝、明目等功效，千祈咪錯過呀。