數碼港特色市集 欣賞夢幻「夜光六月」

黛安收到風，知道數碼港商場聯同市集籌辦機構麥田捕手喺今個月23號開始，連續兩個周末舉行「夜光六月」，有全港首個LED彩虹牆、光之藝廊、手作攤檔等，睇相已經好吸引，絕對係打卡熱點！

「夜光六月」顧名思義以夜光概念做主題，上年大受歡迎嘅「夜光貨櫃屋」再度登場，可以喺貨櫃屋入面嘅夜光塗鴉牆上大畫特畫之餘，仲有全港首個由千個彩色LED燈拼砌而成嘅「彩虹牆」，大家可用唔同顏色嘅LED燈砌出各種圖案，仲有「光之藝廊」，好似被燈海包圍咁，非常夢幻，一定好「IGable」！

打卡位又點止咁少，姊妹話，商場特意布置成融合燈光同自然嘅七彩霓虹燈森林。森林掛滿燈飾，逾千枝微型光串由樹頂垂下，搭配光影效果，好似置身喺美輪美奐嘅光影世界。

鍾意手作嘅朋友仔，亦可以參加有超過50個本地設計嘅攤檔同「夜光襟章工作坊」，有衣服配飾、皮革、香薰、珠寶等，為迎合主題，仲特別增加以夜光做賣點嘅攤位，包括限定夜光Henna、「Raccoon Land」同「Welentine」製作嘅夜光首飾等！

行市集之餘，不妨沿途欣賞下數碼港，商場特別用十二星象設計藝術裝置，放咗喺户外草地，作品以多個夜光小圓球同光纖燈組成星象，漫步其中夠寫意。想打卡，記得6月23、24、30號同7月1、2號嚟數碼港商場啦！