華特迪士尼國際動畫節 港生勇奪最傑出大獎

香港學生又揚威海外！嚟自天水圍順德聯誼總會翁祐中學嘅兩位學生憑動畫《Toy Train》，喺華特迪士尼國際青少年動畫節獲得最傑出國際動畫大獎，認真厲害。

黛安知道上年該校都有參加呢個動畫節，仲獲得最佳故事大獎。而今年公關姊妹同黛安講，由中四生Shah Anila同劉穎儀製作嘅《Toy Train》，一樣憑技術、故事、創意、角色同場景設計等各方面出色表現，贏得最傑出國際動畫大獎。

動畫故事背景係70、80年代，講述一位小男孩家境貧窮，好渴望擁有一架玩具車，爸爸為咗達成兒子願望，辛勞賺錢，但後來小男孩無將啲錢拎去買玩具車，反而放喺錢罌存起來。作品用咗半年幾時間去製作，每星期要用約15小時，全部都係同學用課餘時間做，Shah Anila話，單係流淚嘅鏡頭就已經用咗幾十日去製作，好高難度。

原來故事靈感嚟自佢哋嘅童年，因出生基層家庭，好渴望可以擁有其他小朋友嘅玩具，覺得父母唔買畀就係唔錫佢哋，長大才明白父母嘅辛勞，希望透過故事令大家明白感恩同孝順父母。