星夢郵輪海上電競場 玩《FIFA 18》迎世杯

4年一度嘅世界杯好快就開始，唔少熱愛足球同電競嘅朋友都玩住《FIFA 18》嚟迎接盛事。前幾日，星夢郵輪仲邀請咗黛安同一班商台DJ，上咗「世界夢號」嘅全球首個海上電子競技場暢玩《FIFA 18》！

上星期五係世界夢號海上電子競技場揭幕日，競技場喺全球最大規模海上VR遊戲中心「VR探索館」入面，面積達1,700平方呎，可以畀10位玩家同時對壘，並可容納80位現場觀眾，而且船上嘅星座劇院、大堂、餐廳、海灘派對俱樂部、以至客房，全部LED顯示屏都支援現場直播，至少可以畀3,000幾人一齊睇live！

揭幕嗰日，星夢郵輪同商台合辦「電競足球預演賽」，一班足球愛好者同DJ喺《FIFA 18》入面大戰，而黛安同其他觀眾就喺4K LED顯示幕牆睇live，氣氛一流！星夢郵輪總裁戴卓爾‧布朗話，海上電子競技場提供專業設備同豐富遊戲選擇，無論專業定業餘玩家都可以盡情享受電競嘅樂趣。