旅發局推清真旅遊 拓東南亞客源

好多東南亞旅客都鍾意嚟香港旅行，舊年就有245萬過夜嘅東南亞旅客，而當中印尼同馬來西亞旅客，更分別有近40萬㗎。黛安同旅發局副總幹事葉貞德（Becky）傾開，佢話呢兩個地方嚟嘅旅客好多都係回教徒，所以旅發局計劃加強推廣本港「清真旅遊」體驗，吸引更多回教徒旅客訪港。

對購物美食情有獨鍾

Becky話，回教徒旅客將會係一個高增長嘅市場，商機龐大，香港應該要加強開設相關嘅配套。雖然本地大部分業界或商家依家未係好重點開拓回教旅客市場，但部分大型景點同酒店等都設有祈禱室等嘅回教友善設施，亦有冰室喺分店設立獨立清真餅房，專造無豬油同豬肉成分、以認證清真食材製造嘅菠蘿包，令回教徒都可以品嘗地道美食。

到底喺印尼同馬來西亞旅客嘅眼中，香港係點呢？聽印尼旅行社代表Endang Ekasanti講，原來當地嘅後生仔好鍾意嚟香港玩，最鍾意就係去迪士尼樂園，而佢自己就最鍾意食香港嘅點心！馬來西亞旅行社代表Hawa Ahmad就話，佢哋對於香港嘅購物天堂同埋地道美食等，特別情有獨鍾，又讚香港人友善、樂於助人，仲有好多靚仔靚女，黛安聽到都好高興！

Hawa話，原來回教徒去旅行嘅時候，每日都要早午晚祈禱3次，但有時就會因為行程或者地點而進行唔到。佢同Endang都希望香港多啲大規模啲嘅清真餐廳，方便容納佢哋嘅旅行團，亦希望本地接待商加強認識回教文化，確保佢哋喺旅途中可維持日常儀式。