150張絲印明信片 誠品有得睇

黛安平時好鍾意去誠品銅鑼灣店化身文青，鍾意佢地方大又多書，最近仲舉辦連串關於印刷技術嘅活動𠻹。誠品銅鑼灣店下星期五（27日）起至5月31日舉辦「Print Jamming」印刷展，引入超過500件新品，包括誠品獨家嘅絲印飲料提袋，同埋可以體驗到字粒排版嘅「字田‧活字盒」等，會員仲有專屬9折優惠。

另外，仲有兩場主題展覽都唔可以錯過，包括即日起至下個月6日舉行嘅「Mr.Giraffe 2018 Postcard Exhibition」，會展出150張表達唔同心情嘅本地絲印明信片，期間仲會免費派獨家設計明信片𠻹！緊接5月7至31日就會有「師傅話‧活字說」展覽，展示香港昔日酒樓嘅點心紙同埋鉛字版，仲會有工作坊畀大家試用古董印刷機，製作獨一無二嘅文具。