香取慎吾中環繪壁畫 向世界宣傳香港

黛安噚日經過中環至半山嘅自動扶手電梯，發現多咗幅壁畫，上面寫住「大口龍仔」，夠晒型。旅發局公關姐妹話，幅畫係出自日本著名藝人兼藝術家香取慎吾嘅手筆，親自通宵畫上去，香取噚日仲到場同大家見面！

有幸搵到香取嚟幫手，聽姊妹講番，其實係舊年6月嘅時候，香取嚟香港拍日本電視節目時，畀中環嘅街頭藝術吸引咗，結果旅發局邀請佢參與「香港藝術月」，嚟香港做藝術創作，佢就即刻應承咗啦！

今次作品係位於荷李活道同些利街交界嘅中環至半山自動扶手電梯外牆，係香取第一個嘅海外作品，仲取名做《大口龍仔》。香取噚日話，20年前嚟香港拍電影《香港大夜總會》時，粉絲都叫佢做「大口仔」，所以就起咗呢個名，希望自己就好似龍一樣，透過佢嘅作品為香港人同世界各地旅客帶嚟活力。

「大口仔」對作品非常用心，先喺今年1月嚟香港物色地點，之後就由上個星期六開始，一連三晚通宵由凌晨零時畫到早上6點，先完成壁畫。佢自己都話最辛苦就係要捱夜，畫完之後再返酒店休息。所以佢希望大家快啲去欣賞，影完相就#hkshingoart係社交媒體平台share出去，畀多啲人知道！佢仲即刻用ig做直播，向全球粉絲「曬畫」，夠晒親民啊！