全球最長樂高積木橋 登陸圓方

橋可以幫相隔嘅人聯繫起來，而由AECOM全球長跨度及特殊橋樑（交通運輸）總監岑肇雄博士（Dr. Robin Sham）設計嘅，全球最長、創下健力士世界紀錄嘅樂高積木橋，就正式去到西九龍ELEMENTS圓方展覽，畀公眾大開眼界！

呢條全球最長跨度積木橋，公關姐妹話足足用咗超過26萬塊樂高積木砌成，全長超過33米、最大跨度16米、重逾半噸，2016年首次喺英國倫敦ICE圖書館組裝成功，已經創下健力士世界紀錄。展覽剛剛喺噚日開幕，直至4月22號，黛安由橋頭行到橋尾，都用咗超過5分鐘，實在佩服設計師嘅心機！

大家可以喺香港睇到呢項巨作，全賴英國土木工程師學會、基礎設施全方位綜合服務企業AECOM、港鐵，同埋協助呢項工程嘅英國樂高建築公司Bright Bricks、大橋設計師岑肇雄博士（Dr. Robin Sham）。岑博士喺香港出生，參加咗多項地標性大橋工程，包括世界最長嘅兩座斜拉橋昂船洲大橋同內地嘅蘇通大橋，佢就話希望透過呢座橋，激勵香港新生代年輕人！