復活節商場賞櫻 玩轉繽紛遊樂園

復活節係旅遊旺季，但黛安覺得留港消費一樣開心！事關好多商場都有復活節特別活動，有以傳統復活蛋為主題，亦有大玩文青feel嘅藝術文化，仲可以睇春日櫻花，唔使去日韓啦！

屯門時代廣場、沙田中心及沙田廣場會有「復活遊樂園」，屯門時代廣場就有12呎高嘅繽紛遊樂園舞台，有爆炸頭小兔同大家玩；沙田中心就有成13呎高嘅巨型遊樂園帳篷，小丑兔會係帳篷上來回表演踩單輪車同飛天鞦韆，粉嶺中心就有小丑兔同大家互拋七彩光圈練身手。

黛安知道有商場就用花做主題，好似華懋集團旗下三大商場，希爾頓中心、好運中心及粉嶺名都將由今個月17號至下月22日期間舉行「春櫻遊樂園」，將櫻花美景帶入商場；MCP新都城就有少女心爆發嘅4米x8米嘅春日櫻花巨型帳幕，仲有藤椅同巨型春花裝置，啱晒黛安影文青照！

黛安知都有商場用藝術展覽做主題，等大家趁放假吸收下藝術文化氣息。好似太子始創中心就請到澳門著名藝術家王瑞麟同佢嘅創作團隊「6號藝術工廠」，首次喺香港展出50件以紙漿蛋托作為繪畫材料嘅立體彩繪創作，展覽更有香港限定嘅「復活節」及「香港地標景致」新作，充滿本土特色。

荃灣千色匯及元朗千色匯就請嚟插畫師Josef Lee，在商場重現繪本《抵達快樂，請叫我》場景；馬鞍山新港城中心就有全港首個「創意太陽蛋畫藝術展」，展出由本地便當達人Candace Mama親手製作嘅創意煎蛋藝術作品。黛安都要諗下約姊妹去邊個先！