PMQ特色生活市集 歎盡精緻咖啡

香港人生活節奏急促，好多人日忙夜忙，但就忘記咗享受生活。黛安覺得，公餘時間可以歎番杯靚咖啡就最好不過啦。嚟緊PMQ元創方就會舉行「The Coffee Agenda咖啡生活市集」，畀咖啡迷嘗盡唔同特色咖啡。

市集將會喺今個月30日至下月2日舉行，雲集多位獲獎咖啡師同超過16個本地咖啡愛好者熱捧嘅精品咖啡店。近年流行韓風，所以大會特意首次引入韓國時尚精品咖啡品牌Bean Brothers，入場嘅咖啡迷可一次嘗盡兩地最具特色嘅精品咖啡。

黛安收到風，到時仲會有多個獲獎咖啡師分享沖製技巧同傳授各類咖啡知識，包括香港咖啡拉花大賽冠軍Keith Tse及香港咖啡大師賽（HKBC）冠軍Dawn Chan等，畀一眾啡迷有機會同多個世界級或獲獎咖啡師交流。

有咖啡又點可無美食呢？大會特別搜羅咗各類美食，例如有新鮮製作嘅牛角包、窩夫甜品、All day Breakfast等等。仲會有大大小小接近30個嘅攤檔，售賣適合配搭咖啡的糕點、朱古力同其他美食、以及花藝裝飾和精品擺設等。

此外，現場會有唔同嘅咖啡原料藝術再造工作坊，例如手作咖啡杯墊、咖啡去角質手工皂、咖啡繪畫乾花工作坊等，咖啡唔單只係飲咁簡單。

有得飲咖啡之餘仲可以參與唔同嘅工作坊，同黛安一樣係咖啡迷嘅朋友一定唔可以錯過呀！