鹹蛋令主角變得更精采

過了新正頭十五，口沒遮蘭可以百無禁忌了。通常叫人去賣鹹鴨蛋，即是咒人去死。點解賣鹹鴨蛋即是死呢？因為以前死者入棺時，棺材底會放大量牙灰，而鹹鴨蛋的製作過程中也會加入大量牙灰，故有此譬喻。

叫人「賣」鹹蛋可能畀人啋過你，但叫人買鹹蛋便不會令人抗拒了，尤其是送今時今日新加坡人氣零食鹹蛋魚皮或鹹蛋薯片，更叫人愛不釋手！之前當這兩款零食還未登陸香港時，每次當知道有人去新加坡，我必定求朋友為我買來幾包。就算是在新加坡買也不容易，因為要一早去排隊，還要每人限買五包，認真巴閉！

終於，香港有得買了！在特定店賣55元一包，但時常缺貨。有一天給我在九龍城看見，興奮！但不夠一分鐘，因為同一包鹹蛋零食，那裏賣88元！未食先「鯁親」，當然買唔落手！

其實鹹蛋黃是一個絕配，它跟很多食物都配撘到，令你吃得興奮。除了配魚皮和薯片外，另一款鹹蛋麥芽糖餅乾，亦是近期令我吃上癮的零食！

不要以為鹹蛋好cheap，它能令本身有價值的對手味道更上一層樓。你試過食一啖鹹蛋黃再呷一啖陳年香檳未？嘩！不得了！那種如魚得水的感覺，令人的眼球都差點彈出來，絕對唔講得笑！發現用鹹蛋做配襯的人真的很聰明。

不過，好食還好食，都要識得睇住嚟食！鹹蛋的膽固醇含量高，有心血管病、肝腎疾病的人便得格外小心。鹹蛋的含鹽量高，高血壓和糖尿病患者不宜多吃。孕婦體內雌激素有促使水份和鹽在身體內過多存留，攝入量遠超身體所需，容易造成高度水腫。所以，雖然惹味好吃也不要吃太多，正所謂「凡事太盡，緣份勢必早盡」，到時真係唔慌唔去賣鹹鴨蛋了！

（本欄逢周四刊登）