五月天開露天音樂會 選址香港迪士尼

黛安係「五迷」，即係台灣組合五月天粉絲，每年最期待嘅梗係「五月之約」！之前聽見五月天放出紅館檔期，黛安一直好關注佢哋會移師去邊度開騷。噚日終於有消息啦！原來五月天揀咗香港迪士尼作為舉辦戶外音樂會嘅場所，黛安所知，今次更加係迪士尼第一次舉行露天音樂會𠻹！

票價最貴$1180

主辦方噚日喺fb宣布，五月天將會喺5月初喺迪士尼幻想道露天場地舉行5場演唱會，主題係「五月天LIFE《人生無限公司》2018巡迴演唱會無限放大版」香港站。香港迪士尼發言人話，今次演唱會迪士尼作為場地提供者，希望可以好好配合。

為咗體貼五月天迷嘅「加班」需求，今次演唱會嘅演出時間仲會提早到夜晚7時15分開始𠻹！黛安知道，今次香港站場地可以容納2萬人，門票喺今個月29日喺Cityline全綫公開發售，票價分坐位同企位，票價介乎$480至$1,180。黛安仲知道，「五迷」喺今個月19至23日，仲可以透過東亞銀行信用卡優先訂飛𠻹！詳情可以瀏覽特高娛樂嘅fb專頁，希望到時撲飛唔使撲得咁辛苦！

五月天今次之所以揀喺戶外演出，係希望可以令歌迷感受到更震撼嘅視覺效果，相信現場一定好有氣氛，黛安依家已經好期待喇！