邊跑邊歎美食 全城街馬變身嘉年華

「香港街馬」噚日喺觀塘繞道至舊啟德機場跑道一帶舉行，有1.1萬人參加，黛安當然都要去湊下熱鬧啦！去到現場，黛安覺得香氣撲鼻，原來今年比賽以「玩•食跑」做主題，沿途補給站有好多特色美食，唔少跑手仲悉心打扮，以特別服飾作賽，令成個比賽生息不少，好似置身嘉年華一樣呀。

雖然每個馬拉松比賽都有補給站，但有鮑魚、叉燒飯、牛柳粒、砵仔糕等補給，黛安都係第一次見！大會特登將所有食物準備成一啖食完嘅大小，方便跑手進食，唔少參加者都畀食物嘅香氣吸引，尤其係即場用鐵板翻熱嘅一口牛柳更吸引大批跑手駐足，成功帶動現場氣氛！

不過，令黛安印象最深刻都係一眾跑手嘅悉心打扮，現場有蝙蝠俠、美少女戰士、Mario等人物，為咗配合狗年，仲有人以Snoopy同埋有狗仔跟喺後面嘅形象現身，創意爆燈。

雖然有跑手覺得要停低食嘢唔方便、提供大量食物同飲品造成唔少即棄垃圾等等，不過全城街馬主席兼創辦人張亮話，希望為跑手打造最好玩嘅街跑體驗，並會繼續為不同慈善機構籌款。希望之後全城街馬都會帶來更多歡樂又有益健康嘅比賽畀我哋啦！