大家樂區區開年飯 請1,500名基層食盆菜

新年食「開年飯」寓意合家團圓，黛安噚晚獲邀出席大家樂「區區開年飯2018」啟動禮，活動喺噚日（22日）起至下月23日，會在全港18區舉行總共38場開年飯，等一班基層市民可以去大家樂集團旗下嘅食肆享用盆菜，每場可以招待40人。大家樂CEO羅德承同黛安講，新年係一家團圓嘅喜慶日子，希望呢個活動可以為基層家庭帶嚟新年氣氛，佢仲話活動規模由舊年18場擴至今年38場，受惠者就由720名增加到大約1,500名。

食開年飯對好多家庭嚟講尋常不過，但對基層而言卻非必然。噚日大家樂同場發表咗一個「基層家庭渡歲概況」嘅調查，總共向基層家庭發放咗693份問卷，原來有27%受訪家庭都無食開年飯習慣，當中52%家庭係因為想慳錢，所以話，幸福唔係必然，大家要好好惜福喇。