土建築改良變抗震屋 無止橋獲頒古迹保護獎

中華文化源遠流長，唔少文物都要後人細心保護，先可以留傳畀子孫後代。黛安知道，無止橋慈善基金最近就同國家住房和城鄉建設部聯手，保育甘肅省嘅「住建部馬岔村現代夯土農宅示範與推廣項目」，仲攞埋今年聯合國教科文亞太區文物古迹保護獎𠻹！

評審團仲讚今次保育改良咗傳統建造技術，滿足到現代住屋安全同性能嘅要求，令農村房屋都可以兼顧環保，價錢仲好實惠。無止橋就話，呢個項目已做咗7年，主要係用番農村傳統的土建築工藝，用泥起出抗震環保嘅農房，依家村內已有一座現代夯土村民中心，同7戶示範民居；仲將相關技術推廣到全國8個省份，起咗超過134間新型抗震夯土農房𠻹。