日本人氣小吃 香港7-Eleven都買到

日本嘅7-Eleven出晒名食物種類多，唔少香港人去日本旅行嗰陣，都會去便利店「尋寶」，黛安當然都唔例外！不過，公關姊妹就講咗個好消息畀黛安知，就係即使身喺香港，都可以食到由日本直送嘅小食！

最近香港嘅7-Eleven引入咗新一輪日本大熱嘅小食，由食材到包裝都係日本製造，仲有成18款咁多！其中包括芝士鱈魚條、三重芝士夾心脆果同煙熏芝士小食，啱晒一班「芝士控」！除咗日式芝士風味小食之外，仲有其他選擇，例如無核脆酸梅、日式蝦餅、朱古力粟米脆、一口雞蛋餅同海帶根等，就連爆谷都有，實在啱晒唔同人嘅胃口。黛安就睇中咗辣辣哋嘅明太子味脆圈同乾燒扇貝裙邊，準備等陣去掃貨喇！