富衛鬧市「出蕉」sell保險

噚日經過銅鑼灣，忽然有人向黛安送上香蕉，抬頭一望，居然係富衛香港及澳門首席市務總監謝振國。原來佢特登帶住一班同事落區，「出蕉」宣傳佢哋即將推出嘅嶄新危疾及精神健康保障計劃，希望以健康嘅水果，鼓勵市民關注身心精神健康。哈，有幾有諗頭喎！謝振國同黛安講，香港人工時長，每星期工作超過50個鐘頭，壓力大；佢仲引述世衞估計，抑鬱症將於2020年成為人類第二危險殺手，僅次於心血管疾病。所以大家平日幾咁忙，放工都要識得減壓。至於點解派蕉？佢話香蕉含有豐富色胺酸及維生素B6，有助大腦分泌「快樂荷爾蒙」血清素，可以紓緩情緒，希望透過請大家食蕉，送上一份關懷喎！