黛安
黛安

灣仔會展慶30周年 打造世界級智慧會展中心

發佈時間: 2018/02/06

灣仔會展慶30周年 打造世界級智慧會展中心

黛安噚日獲會展邀請,趁農曆新年前同班姐妹喺君爵廳相聚,拜個早年。會展管理公司董事總經理梅李玉霞(Monica)話,今年11月會展就踏入30周年,作為多次獲選為最佳國際會議展覽中心,會用超過$3,000萬,打造成世界級智慧會展中心,佢仲特別多謝上千名參與其中嘅同事。

要鞏固會展作為世界性地標嘅地位,Monica認為,要軟硬兼施,硬件方面就係將會展keep住靚,係一項浩大工程;例如向海嘅飛翼頂一面有成60米高,打風落雨季節維修難,每年只得呢幾個月可以做,睇嚟為咗省靚地標,佢哋真係落足心機啊!

軟件方面,Monica就話,港府推動Smart City,佢哋就要建立起一個Smart HKCEC(智慧會展中心),包括用超過$3,000萬全面提升展舘嘅Wi-Fi網絡系統,提供一個高速、穩定、無限時嘅免費Wi-Fi服務,相信第三季全部完成,到時走廊、電梯全方位都同一時間可容納超過20,000人用高速Wi-Fi上網。

Monica又話,將會引進一套智慧型管理系統,透過Wi-Fi網絡即時數據分析,按人流調節場館不同地方嘅溫度、濕度、燈光,「好似間房人流多咗變得熱咗,系統機會自動調節溫度,即時改善」,負責同事仲可用手機App操作,夠晒Smart!

Monica笑言,30歲嘅會展,就好似美女風華正茂時,佢話依家頭痛緊30周年應該送咩紀念品畀同事,仲要度一個Slogan。5年前25周年時,每位同事就獲贈一張印有會展嘅中銀$1000紙幣。

黛安講笑話,今日嘅餐牌菜名改得咁好,好似雲裳花艷喜悅容、白裏塗脂續透紅,可考慮下喺餐牌搵靈感做Slogan啦!

撰文: 黛安 消息特靈八卦公關
欄名: 八卦名利場