打造粉紅空間 上海K11送你浪漫情人節

仲有兩星期就到情人節，有無諗過去上海慶祝？黛安收到風，上海K11即日起至3月4日會打造成一個粉紅空間Pink love，全個商場由內到外，無論玻璃穹頂、櫥窗、電梯，甚至洗手間等，都係粉紅色，充滿少女心！

公關姐妹話，新世界集團執行副主席兼總經理鄭志剛（Adrian）想喺情人節搞搞新意思。其中一個亮點係將上海K11嘅洗手間，用電光粉打造成粉色迷幻空間，只要着上粉紅色衫，就可以領取Pink Pass，享有快捷通道服務，搶先打卡影靚相。

唔得閒去上海？香港嘅K11都有「Lover's Market」，2月10號至11號嘅限定市集有各式各樣嘅情侶精品，仲可參加10分鐘快閃工作坊，教包禮物、自製心意卡！