港產導盲犬BB 3年繁殖32隻

導盲犬乖巧又聰明，係視障人士嘅好幫手，但原來依家香港嘅導盲犬數量遠低於所需數目，好多視障人士都仲好需要有導盲犬幫手。前日黛安出席咗香港導盲犬服務中心成立6周年嘅慶祝活動，得知中心喺過去3年成功繁殖咗32隻導盲犬BB，目前總共有43隻，本土繁殖導盲幼犬工作進展順利，真係一大喜訊呀！

黛安聽中心主席張偉民講，現時中心7成半導盲犬係本土繁殖，比起成立時只得兩隻外國捐贈嘅BB已好好多，但呢個都只係起步，估計全港需超過1,700隻導盲犬，希望將來可以成立香港首間導盲犬訓練學校同埋導盲犬精子庫，令更多視障人士受惠。

盼成立學校 訓練狗隻

曾經同導盲犬合作拍劇嘅靚媽胡杏兒都有出席活動，仲宣布會繼續擔任中心嘅關愛大使，真係愛心爆棚呀！佢仲幫手頒發證書畀香港首位本地培訓導盲犬導師李苑甄𠻹，以往只有去海外先可考取資格，依家香港第一次可評核導師資格，可謂導盲犬本土化新里程，黛安都戥佢哋開心！