兩大名廚聯手 炮製米芝蓮中意菜盛宴

聽到名廚楊貫一，大家都會諗起肥美嘅鮑魚，令人流晒口水！黛安知道，富臨飯店創辦人楊貫一（一哥）又有新搞作！一哥今次會同意大利籍米芝蓮三星名廚Umberto Bombana破天荒合作，烹調中、意菜式，並舉行超級晚宴，由意大利米芝蓮大廚走入米芝蓮中式飯店嘅廚房，真係好期待佢哋擦出新火花。

原來一哥同Bombana惺惺相惜多年，不時會到訪對方嘅餐廳品嘗美食。適逢富臨飯店40周年，一哥決定搞搞新意思，請意籍名廚Bombana踏入中式廚房，一齊烹調共8道中意菜式。富臨飯店營運經理潘健偉就話，為確保食物質素，盛宴只此一次，名額只有80個，每位盛惠$8,018另收加一，額滿即止，現已有約30位客人報名。

一哥同Bombana嘅佳餚會喺晚宴中梅花間竹登場。中菜方面，除招牌菜阿一鮑魚扣花菇外，仲有富臨三鮮等；而意菜就有自家製Tagliolini配牛油、巴馬臣芝士及阿爾巴白松露等。每道菜會配唔同靚酒，令每道菜味道更突出。公關姊妹話，其中一道隱藏菜式會係晚宴嘅重頭戲，想知道係咩菜式，即刻報名啦！