港團體籌款行善 緬甸建孤兒院

港人出名有愛心，平日愛做善事幫人。黛安知道，非牟利團體「雲彩行動」創辦人楊偉基伉儷今年5月去到受戰火影響嘅緬甸，租用一棟三層高嘅樓房做孤兒院，喺僅有嘅空間為40名孤兒提供住宿同教育。但當地流離失所嘅孤兒多不勝數，「雲彩行動」計劃明年喺緬甸興建10間「雲彩家園」孤兒院，但要籌集300萬港元，現籌得60萬，只足夠興建2間孤兒院，希望更多港人可伸出援手。

聽楊太講，緬甸近年局勢不穩，人口販賣問題嚴重，大批小朋友被誘拐賣到妓院，即使無被賣到妓院嘅小朋友，都要面對飢餓同毒品問題，所以佢決定要為當地小朋友興建孤兒院，希望當地小朋友可以健康快樂地成長。黛安都覺得要為緬甸小朋友做啲嘢，正所謂有錢出錢、有力出力，黛安自己同身邊嘅好友都會慷慨解囊。