冬季購物節×冬日美食節 周末掃筍貨 $1食龍蝦和牛

臨近年尾，買完聖誕禮物，又要幫媽咪準備辦年貨，黛安都好惆悵。公關姐妹就通知黛安，原來嚟緊周日（24號）至下周四（28號），「香港冬季購物節」同「香港冬日美食節」會喺灣仔會展舉行，有成1,300個攤位，家品、電器、美容、美食一應俱全，可「一條龍」買晒返去啦！

姐妹話，今次購物節規模係歷年之冠，設有多個唔同展區，包括「家居潮流博覽」、「香港車展及國際車品博覽」、「數碼電子消費品及網絡攻略展」同「冬季玩具博覽」等，集齊D.I.Y同創意手作品、美容化粧品、流行服飾、家品、名車、潮流玩具等。單係美食節就有8個展區，雲集本地同世界各地特色美食，好似有台灣大熱嘅大甲乾麵、奧地利直送嘅莫扎特朱古力酒。樣樣都好吸引，黛安可以盡情掃貨啦。

美食節不同展商更推出不少震撼價，其中最驚喜係1毫子買蒜香黃金燒龍蝦、活龍蝦魚翅花膠雞湯火鍋套餐同龍蝦黃金炸魚皮，每日限量推出，第一日蒜香黃金燒龍蝦就限量推30隻。PRIME FOOD仲賣大包，1蚊限時任夾熟龍蝦、和牛扒、黑毛豬午餐肉，每日10個名額。而台中十大手信之一嘅大甲乾麵，4包裝原價53蚊，依家1蚊袋，每日限量30袋。佳節當然唔少得飲番杯，奧地利直送嘅莫扎特朱古力酒，原價380蚊一支，會展價4折賣150蚊！

黛安咁啱想換電視機同電飯煲，姐妹話有着數優惠，購物節期間實惠嘅39吋內置全高清LED電視，原價$3,499，依家賣$999一部，不過全部屬於陳列品，每日限量4部。

同場仲有日系迷你電飯煲，原價495蚊，依家1蚊一部，每日只此1部，要買就要提早排隊啦，黛安決定同媽咪排隊掃貨！