賞百年樹木 嘗美味茶粿 荔枝窩地質公園全接觸

黛安鍾意親親大自然，以前行過船灣郊野公園，由烏蛟騰出發，終點係荔枝窩，全長7.5公里需時3個鐘。黛安上周末就參加咗旅發局姐妹舉辦嘅「香港郊野全接觸」，向全球旅客推介香港嘅登山、遠足、踏單車旅遊指南。

今次黛安唔係行山，係坐船參觀獲聯合國教科文組織（UNESCO）列入世界地質公園名單嘅香港東面海岸！今次一齊去嘅除本地媒體，仲有內地、日本、韓國和外國嘅媒體朋友。旅發局好貼心咁為佢哋安排咗4個來自Eco Travel Limited精通普通話、英文同廣東話嘅導賞員，原來依家全港有48個地質公園導賞員，包括4個認可地質公園導賞員。

當日由旅發局總幹事劉鎮漢做領隊，先由馬料水坐船，經吐露港望向地質公園左岸時，就見到岸邊岩石由原本嘅淡黃色一路變，變成褚紅色。大隊首先去荔枝窩參觀，一路行會見到紅樹林等景觀。然後去到個客家村，主要係曾氏同黃氏兩姓村民。之後仲安排咗我哋品嘗地道嘅蘿蔔絲茶粿同雞屎藤粿。因為係村民新鮮整好，非常美味，極有黛安細過食過婆婆做嘅味道。

黛安留意到，荔枝窩有好多棵過百年樹木，包括五指樟樹，離遠都聞到佢香氣四溢，但黛安奇怪點解只見到四指？導遊Anna話，原來抗日戰爭時，日軍為咗唔想有樹木遮擋而斬樹，村民幾經抵抗下，先保得住四指，好有歷史價值。

呢度好多原居民都離開咗，但近年多咗生態導賞團，黛安當日見到有機構舉行馬拉松，又有團體做保育工作，擺賣本地農產品，包括無基因改造木瓜，每個賣30蚊，無人睇鋪，全靠大家自覺。

黛安當日最開心嘅事，就係遇到《晴報》專欄作者查小欣、胡孟青同魏綺珊。最後大家一齊離開荔枝窩，坐船去吉澳食Lunch同買手信。旅發局Cynthia仲推介食嗰度最出名嘅手打墨魚丸，咬落爽口彈牙，真係好食到停唔到口！