行聖誕市集 VR睇極光 3D打印禮物開Party

今年聖誕好有氣氛，香港都有好多市集逛啊！黛安知道奧海城搞咗個聖誕STEMart，有好多初創企業參加，可以即場用3D printer打印製作聖誕禮物，聖誕派對交換禮物就更有心思啦！

奧海城今年同香港市集協會合作，集合咗超過100個攤檔，由即日起至12月26號嘅每個周末同聖誕假期，都會喺奧海城2期地下露天廣場擺攤，手作、美食樣樣齊。公關姐妹話，為咗支持本地初創企業，特別舉辦STEMart，展示各種高科技產品。除咗有得睇，仲有得買，例如即場試玩人體3D掃描器，配合3D打印機打印出專屬迷你人仔，或試用光影設計聖誕T-Shirt！

玩完覺得肚餓，姐妹話，有兩部美食車會第一次進駐聖誕市集，每個星期會輪流轉換，有Crunch Munch嘅叉燒脆，七桌子嘅黯然銷魂漢堡，大師兄嘅美式叉包等。

另一邊廂，赤柱廣場就打造咗一個芬蘭聖誕市集！超過80個攤檔等住大家參觀，姐妹話，市集仲有「異國極光玻璃屋」、VR體驗芬蘭極光、芬蘭Jacuzzi拍照區，希望畀市民一個真‧芬蘭聖誕體驗。

講到睇聖誕燈飾，當然要去天際100，可以360度睇晒維港兩岸嘅燈飾。觀景台西面嘅天際星海，每晚會喺6點亮燈，好似被繁星包圍咁浪漫！姐妹話，即日至12月21號可以喺天際100官方網站買「Café 100 by The Ritz-Carlton, Hong Kong聖誕晚餐」，每位698蚊，包埋天際100成人門票1張。黛安已經計劃好聖誕行程啦，大家都一齊嚟啦！