垂直跑兼行善 齊助基層兒童項目

黛安平時都好支持環保，間中都會行樓梯代替搭同電梯，但如果要跑幾十層樓梯一定應付唔到，所以好佩服噚日參加「新地公益垂直跑–勇闖香港ICC」嘅朋友，今年仲有1,900個運動健兒參加，係歷年最多！

新地執董兼副董事總經理黃植榮話，今年垂直跑活動嘅收益一如以往都會全數撥捐香港公益金同香港社會服務聯會，用嚟發展基層兒童及青少年項目，新地希望透過舉辦國際慈善體育活動，鼓勵市民多啲做運動、同時幫助社會上有需要嘅人，推廣「運動行善」理念，非常抵讚。

噚日分別勝出男、女子組精英賽事嘅澳洲選手Mark Bourne同Suzy Walsham，分別只係用咗12分37秒同13分58秒就到達位於天際100香港觀景台嘅終點，Suzy仲同時成為垂直馬拉松世界巡迴賽女子組冠軍，真係抵大家為佢哋獻上最熱烈嘅掌聲嘅。