跟Gigi姐學煮餸 提升廚藝技巧

剛過去嘅周末，黛安去咗信興廚藝中心跟廚藝高手黃淑儀（Gigi姐）學入廚技巧，嚟緊聖誕假期打算煮番幾味畀男朋友試下。

黛安平日愛食，但都非常愛煮，今次可以近距離跟Gigi姐學嘢，都落足心機出盡力！Gigi姐果然厲害，三個小時一口氣，風趣幽默，而且真有料到。佢教咗兩道看似複雜，但其實好容易整嘅家常小菜，就係荔荷蒸雞同八寶醬。黛安跟住步驟做，煮完出嚟賣相同味道都似模似樣。

除咗煮餸，Gigi姐仲教大家點發冬菇同乾響螺，原來發冬菇要用片糖，發乾響螺就要用冰糖，黛安又學到嘢啦！

信興電器貿易有限公司總經理莫惠明話，愈來愈多香港人鍾意煮嘢食，集團都試下循呢個方向行，跟唔同廚師合作，將煮食帶到去另一個層次。黛安諗將來又有個好地方跟大廚名人學煮了。