150年陳醋夠配搭 嘗大閘蟹 歎咖啡味威士忌

黛安噚日好有口福，應海洋公園主席孔令成邀請，一齊去銅鑼灣嘅KUROTAKI品嘗他專登揾番嚟嘅陽澄湖大閘蟹！一去到，先知原來唔止有大閘蟹，仲有刺身、壽司、吉列日本的豬扒等，老闆娘Pauline同代理日本清酒嘅Gilbert，仲好細心咁介紹每道菜式同酒，令黛安與一眾賓客都直呼「大滿足」！

黛安仲遇到《晴報》社長麥華章、旅發局企業事務總經理梁美寶（Cynthia）同一班傳媒朋友，大家仲話發現Cynthia最近瘦咗又靚咗。一問之下，原來佢請咗私人教練練跑，由最初跑1公里都覺得氣喘，到而家每次都可以輕輕鬆鬆完成十幾公里。Cynthia就話其實每次都要做體能訓練，一做就2、3個鐘，做完已經好累，飯都唔想食。海洋公園嘅Una就講笑話其實Cynthia最有食神，皆因份工經常要飲飲食食，所以更加要keep fit，大家仲一齊搶住話要介紹個私人教練。

大家言談甚歡之際，主角陽澄湖大閘蟹就終於登場！大家一齊分享食蟹心得，先發現原來個個都係「蟹王蟹后」，每個人都食咗2至3隻，真係多謝晒孔令成主席，佢仲帶咗支150年嘅意大利陳醋嚟，用來配蟹剛剛好，之後登場嘅吉列豬扒同樣非常好味，簡直係一場味蕾嘅盛宴！

快活不知時日過，食完仲歎咗杯藍山咖啡，但點知原來Gilbert帶咗支擺咗咖啡豆入去嘅威士忌NIKKA WHISKY嚟，黛安一試愛上，同平時飲開嘅威士忌完全唔同，Cynthia仲建議將威士忌淋上雪糕食，味道簡直一流！大家已經相約下次再食過！