未食過咁好食嘅四川火鍋 小欣姐大讚「火鍋英雄」

《晴報》專欄作者Cally同黛安都食辣，又是蟹癡，佢約我前晚一齊去新開嘅四川火鍋店「火鍋英雄」。去到發現一班嗜辣嘅好姐妹都喺度，有黛安偶像天然美容專家Ling姐，仲有帝苑酒店嘅Heidi、《晴報》專欄作家胡孟青（青姐）、查小欣（小欣姐）、鄧達智同佢嘅好partner陳醫生（Clement），鴻星嘅詩姐仲帶咗6支酒嚟。

嗰晚Cally就同拍檔Isaac為我哋先安排一個麻辣鮑魚同象拔蚌刺生，仲有胡椒蝦、剁椒魚頭、麻辣蟹和鹽酥豬腦。之後仲有重頭戲招牌青花椒大魚頭鍋！黛安一試愛上，湯底不只有辣，而係有層次感，入口時覺得好辣，到嘴邊會慢慢溶化，嗰種椒香味會由口腔度滲出嚟，好食到停唔到口。

聽Cally講，火鍋店老闆娘Tracy係重慶人，之前喺人氣川菜館「滿江紅」嘅主理人，而家同老公Peter一齊拍住上，請嚟「滿江紅」第一代主廚甄駿堅師傅做主廚，而曾經為川菜名店「駿景軒」摘下《米芝蓮》殊榮嘅成都名廚谷曉榮師傅就擔任顧問廚師。Cally同黛安講，香港人其實好鍾意食辣，呢間火鍋店開業唔夠兩個月，生意好好，晚晚座無虛席。

因為實在太好味，黛安都忍唔住請教主廚嘅秘訣？甄師傅就話，大部分湯鍋都係用自家製麻辣湯膽加上獨門配方，湯膽提煉需要5個鐘以上，亦都堅持每隔1至2日先做一小鍋，唔會一次過煲一大鍋食足1星期。咁講究，難怪小欣姐都話未食過咁好食嘅四川火鍋啦，Ling姐仲話無味精，返屋企唔使狂灌可樂！

大家都話要再約出嚟食多次。