香港國際美酒展 歎盡全日本佳釀

今年美酒佳餚巡禮雖然過咗，但想歎美酒仲有好多機會。黛安之前試過日本氣泡清酒七賢的「杜ノ奏」，深深畀佢嗰種獨有嘅木桶味吸引住，同公關姐妹傾開，原來本周六（11日）舉行嘅「香港國際美酒展2017」會增設日本館，到時同品牌嘅「星ノ輝」同「山ノ霞」都有得飲，黛安梗係mark定時間表幫襯啦。

公關姐妹仲推介，日本釀製威士忌都好耍家，好似「Pure Malt Whisky YAMAZAKURA」就用咗成5年以上時間，將麥芽、雪莉酒桶麥芽同泥炭麥芽放喺橡木桶到熟成，飲起上嚟夾雜果味同煙熏味，層次好豐富㗎！

今次日本館仲請咗成22間日本單位出席，由日本最北端嘅北海道到最南端嘅鹿兒島美酒都有得飲，仲有專人示範點用燒酒溝雞尾酒飲，今次實行不醉無歸。