蘭桂坊變身日本市集 試食岩手A5和牛

鍾意日本文化同美食嘅朋友，如果最近去唔到日本，可以下周六同日，去蘭桂坊舉辦嘅「日本秋祭」嘉年華「止渴」。黛安聽聞，蘭桂坊到時會有巨型鳥居同天燈做裝飾，化身日本秋祭市集，仲會有超過40個攤位，包括岩手縣罕有A5和牛試食、沖繩縣阿古豬、章魚燒、關東煮、燒雞串同熊本縣燒酎等日式佳餚美饌。好鍾意日本美食嘅黛安，真係聽到都流口水。

除咗日本美食，大家仲可免費試穿和風浴衣喺充滿日式情懷嘅市集漫步影相。嘉年華又有日本傳統祭典舞蹈、忍者、空手道、劍道、武士舞台表演，同埋難得一見嘅德島縣著名藍染製品時裝表演。而且，大家仲可以體驗日式臉部彩繪同專業髮型設計。

蘭桂坊協會主席盛智文博士介紹，蘭桂坊嘉年華已連續舉辦咗16年，會繼續為大家帶來新驚喜。下周末，各位姊妹不愁無節目啦！