「街坊廚神」小儀 太古城開車仔麵檔

車仔麵、蝦多士，黛安細細個就開始食啦。不過人大咗，食嘢都追求番啲質素同衞生，再喺街邊「風塵僕僕」咁食絕對No way！不過想尋回童年回憶都唔難吖，好似太古城TREATS呢排就邀請咗DJ小儀開嘅「麵麵店」進場開設Pop-up食肆，只係開3個月，想食就要快啲去試啦！

吃出老香港風味

問番公關姐妹先知，原來小儀一直都係TREATS嘅「美食騎師」，之前推介咗唔少本地美食店做POPTREATS，搞到身為「街坊廚神」嘅佢都技癢，帶埋拍檔Stephen Chong將「麵麵店」帶入港島區，Stephen仲特登搵咗啲懷舊鐵碟來裝撈麵，「老香港」風味出晒嚟，真係叫碗麵來打卡都抵。

講番有乜好食先，小儀話今次特登調配咗懷舊辣汁乾撈車仔麵，用上秘製傳統醬汁，每一啖都係「香港回憶」。10月更有盞鬼嘅限定美食「滿汗全席」，有齊晒舖頭供應到嘅材料。食完麵記得要飲埋招牌湯底「薑酒湯」，個湯用咗醋、薑、玫瑰露同黃酒調製，又濃又暖胃，平日坐office吹得冷氣多都可「一秒驅寒」啦。

如果唔想食麵，仲可以試下招牌辣菜脯、響鈴特製香脆腐皮魚肉，同「竹炭法包蝦多士」；遲啲仲有煎釀三寶同麻辣蓮藕，同埋勁有特色嘅紫背天葵特飲品揀𠻹。