5/10開業 一田元朗開超市 首設和洋潮食區

元朗居民留意，以後逛超市又多一個新蒲點！事關一田將於兩星期後、即係10月5日，喺元朗YOHO MALL一期開設第十間分店，仲會推出獨有嘅「和洋潮食專區」。一田CEO黃思麗（Susanna）向黛安透露，專區除咗會引入人氣拉麵店、甜品舖，仲會提供日本新鮮空運過嚟嘅當造海產，讓身處香港嘅大家隨時品嘗到北海道勝手丼（按喜好自選配料的海鮮丼飯），並設屋台專櫃，提供關東煮、炸物等輕食。叫得做「和洋」專區，當然唔止日本美食咁簡單，黛安知道入面仲有由德國百年品牌開設嘅Cocktail Bar及環球生蠔吧，真係聽見已經流晒口水喇！

舉辦食品節 迎中秋

臨近中秋，多間一田分店乘勝舉辦中秋食品節，開賣熊本熊、Sanrio等卡通月餅，另有貓山王榴槤、醇香濃茶及乾果等口味特別嘅月餅；同場並以低至47折發售鮑魚、花膠等海味。指定日子用一田信用卡、銀聯卡或Apple Pay付款仲可獲現金券，抵上加抵！