華嫂冰室進駐灣仔 灣仔限定$38歎黑松露忌廉通粉

港島人有口福了！憑住一個番茄蛋菠蘿油，同濃厚人情味打出名堂嘅華嫂冰室，繼兩年前由元朗屏山殺出觀塘後，即將喺灣仔開設第2間分店，並於今日試業！黛安記得之前觀塘開店時，冰室特別推出限定菜式，今次都唔例外，推出「灣仔限定」鮮油砂糖豬仔包、黑松露忌廉通粉同炸雞球，真係齋聽都流晒口水呀！

分店仍交三子打理

華嫂冰室係元朗圍村「名物」，主理人當然係華嫂！但分店仍由佢三位公子打理。大哥鄧智燊（阿B）同黛安講，當初媽咪考慮咗好耐先肯放手畀三兄弟開分店，擔心佢哋會因錢銀傷兄弟感情。後來華嫂決定放手，只係再三提醒食物品質最重要；三兄弟對媽咪嘅話都好上心，不時入廚房監督，並於觀塘設食品工場統一品質。

阿B又同黛安分享，兄弟間曾因分店選址而激烈討論，「我哋考慮過喺屯門開分店，始終港島租貴、又遠。」但為咗令更多港人接觸到「華嫂」美食，最後寧願捱貴租，令港九新界各有一間店。

人情味可以話係華嫂冰室嘅靈魂，而要將呢份人情味帶入新店，阿B話︰「阿媽教落，如果客人倒瀉咗杯嘢飲，就應該盡快抹乾淨張枱，然後免費沖過畀人；凡事唔係錢行先。」對客人窩心，啲嘢又咁好味，難怪生意愈做愈大啦！