誠哥投資健康產品 陸續進駐屈臣氏

之前黛安同大家提過，長和系主席李嘉誠（誠哥）嘅「抗衰老秘方」TRU NIAGEN，今日會喺屈臣氏獨家首發。

烏龍茶兼具漱口功能

噚日屈臣氏開咗個產品發布會，黛安喺現場見到維港投資嘅公關姊妹，佢話公司近期投資多咗零售產品，相信同屈臣氏有唔少合作機會，例如主打「負卡路里」、飲一罐可以消耗100卡路里嘅能量飲品Celsius，就已經進駐咗屈臣氏。

佢仲透露，最近幫緊兩款新品打入香港市場，包括一款有漱口水功能嘅烏龍茶，同一間日本公司Nanoegg研發嘅補濕祛皺護膚品，都有機會同屈臣氏合作。

講番個發布會，屈臣氏總經理張慧屏（Diane）、TRU NIAGEN生產商ChromaDex創辦人Frank Jaksch等都有出席，原來維港投資之前注資咗$2,500萬美元（約$2億港元）畀ChromaDex，不過公司今次推出嘅TRU NIAGEN並唔係天價，每樽$388，就有一個月分量。

Diane仲話，屈臣氏都發現港人對健康產品需求上升，而且有年輕化趨勢，佢哋之前調查過，發現35歲以下、有食健康產品嘅人，有雙位數升幅，睇嚟呢個market前景無限。